Мектебімізде “Жеңіс жолындағы еңбек пен жігер” атты мотивациялық кездесу өтті. Шараның басты қонақтары – дзюдодан Олимпиада ойындарының қола жүлдегері Ғұсман Қырғызбаев және оның бауыры, қазақ күресінен әлем чемпионы Ғұмар Қырғызбаев болды. Кездесудің мақсаты – оқушыларды салауатты өмір салтына баулу, еңбекқорлық пен табандылықтың маңызын түсіндіру, сондай-ақ қонақтардың жетістіктері арқылы жастарды шабыттандыру.

Кездесу барысында қонақтар өздерінің спорттық жолы мен өмірлік тәжірибелері туралы әсерлі әңгіме өрбітті. Ғұсман Қырғызбаев Олимпиада жеңістерінің артындағы қажырлы еңбегі мен тәртібі туралы айтса, Ғұмар Қырғызбаев жастарды тәртіп пен табандылыққа шақырды. Қонақтар спорттың адамның жеке дамуы мен ел абыройын арттырудағы рөліне тоқталып, оқушыларға арман мен мақсатқа жету жолында ешқашан берілмеу керектігін айтты.

Шара барысында оқушылар өздерін қызықтырған сұрақтарын қойып, жеңіс пен қиындықтарды еңсеру жолдары жайлы құнды кеңестер алды. Сонымен қатар, мектеп оқушылары қонақтарға арнап патриоттық ән шырқады.

Кездесу естелік суретке түсумен және қонақтардың ізгі тілектерімен аяқталды. Бұл шара әрбір қатысушыға шабыт сыйлап, табыстың кілті – еңбек пен жігер екенін тағы бір мәрте дәлелдеді.