Бүгін, 15 қаңтар күні мектебімізде Жалпы білім беретін пәндер бойынша республикалық олимпиаданың ІІІ (облыстық) кезеңіне мектебімізден қатысқан оқушыларды марапаттау үшін салтанатты жиын оздырылды.

Мақсаты: Оқушылардың білімділік, тәрбиелік және зияткерлік әлеуетін дамытуда ынталандыру жүйесін қалыптастыру, жалпы білім беретін пәндер бойынша облыстық олимпиаданың қорытындысы бойынша жүлдегерлер мен қатысушыларды марапаттау.

Салтанатты шараға «Батыс Қазақстан облыстық дарынды балаларға арналған мамандандырылған ақпараттық технологиялар мектеп-лицей-интернаты (Педагогикалық лицей) түлектерінің Қауымдастығы» қоғамдық бірлестігінің басшысы, мектебіміздің тарих пәні мұғалімі, 2010 жылғы түлегі Жексенов Азат Бисембаевич және қауымдастық мүшелері Жангалиев Ринат Жұмагелдіұлы, Ермеков Момыш Мәуленұлы, Жұмағалиев Әділжан Болатұлы, Атошев Дәулет Сабырұлы қатысты.

Салтанатты жиын мектеп директоры Шонбаев Жеңіс Меңдіғалиұлының олимпиада қатысушылары мен жеңімпаздарын құттықтау сөзімен ашылды.

«Мектеп түлектері қауымдастығы» қоғамдық бірлестігінің мүшелері дәстүрлі білім додасына қатысып, жоғары білім дағдыларымен ерекшеленген дарынды оқушыларымызды құттықтап, қаржылай сертификаттар табыстады. Облыстық олимпиадаға қатысқан 25 оқушыға 10 мың теңге, «Алғыс хатқа» ие болған 9 оқушыға 15 мың теңге, ІІІ орынмен марапатталған 11 оқушыға 20 мың теңге, ІІ орынға ие болған 6 оқушыға 25 мың теңге және жүзден жүйрік шығып, үздік нәтиже көрсеткен І орын иегерлері 3 оқушыға 30 мың теңге сертификаты беріліп, ынталандыру сыйлықтарының жалпы құны 845 мың теңгені құрады.

Пәндер олимпиадасының Республикалық кезеңіне жолдама алған оқушыларымыз Аманғали Ақылбек, Жасқайрат Аяулым, Бегова Милана, Гиссатден Нұрәділ, Қамен Дильназ, Ерсайнова Умитжан, Валитова Софияға сәттілік тілеп, жүлдемен оралуларына сенім білдірді.