4 наурыз күні интернат тәрбиеленушілері үшін ерекше мазмұндағы іс-шаралар ұйымдастырылды. «Тәрбиемен берілген білім – өлшеуі жоқ қазына» атты интернат тәрбиешілерінің апталығы аясында өткізілген бұл шаралар оқушылардың жан-жақты дамуына, ұлттық құндылықтарды бағалай білуіне ықпал етті.

Күннің басты жаңалығы – оқушылар үшін үзіліс кезінде ойнатылған «Кім жылдам?» ойыны болды. Бұл қызықты сайыстың мақсаты – балаларды икемділікке, жылдамдыққа, байқампаздыққа тәрбиелеу. Ойын барысында қатысушылар өздерінің зейінділіктері мен шапшаңдықтарын сынға салып, қызықты бәсекеде белсенділік танытты.

Сонымен қатар, осы күні интернат тәрбиеленушілеріне ұлттық құндылықтарды дәріптеуге бағытталған «Ұлттық қолөнер – баға жетпес құндылық» атты шеберлік сағаты өткізілді. Іс-шараны Х. Есенжанов атындағы балалар және жасөспірімдер кітапханасының өнер жөніндегі әдебиеттер бөлімінің басшысы А.Р. Губашева мен кітапханашы А.Д. Шарипова жүргізді. Оқушыларға ұлттық нақыштағы қол сөмкенің жасалу жолдары жан-жақты түсіндірілді. Шеберлік сағаты барысында оқушылар өз қолдарымен сөмке жасап, оны түрлі моншақтармен безендірді. Бұл шығармашылық жұмыс балалардың қызығушылығын оятып қана қоймай, олардың эстетикалық талғамдарын дамытты.

Шара соңында интернат тәрбиеленушілері шеберлік сағатынан алған әсерлерімен бөлісіп, болашақта осындай іс-шаралардың жиі өткізілуін қалайтындарын жеткізді. Олар кітапхана қызметкерлерімен тығыз байланыста болып, жаңа шеберлік сағаттарына қатысуға ниетті екендерін білдірді.

Интернаттың тәрбие ұжымы қонақтарға өз ризашылықтарын білдіріп, алғыс айтты. Мұндай тағылымды кездесулер оқушылардың ұлттық құндылықтарға деген құрметін арттырып, олардың жан-жақты дамуына үлкен ықпал етеді.