Наурыз – жыл басы, күн мен түннің теңелетін, тіршілік әлемнің қайта түлейтін, ақтың молаятын, жарықтың ұзаратын көктем мерекесі.

Бұл мейрам - достық пен бірліктің, жаңарудың, ынтымақ пен мейірімділіктің нышаны.

Оқушыларға мерекенің тарихи маңызын түсіндіру, ата-бабамыздан ұрпақтан-ұрпаққа беріліп келе жатқан ұлттық тәрбие туралы түсінік беру мақсатында Батыс Қазақстан облыстық дарынды балаларға арналған мамандандырылған ақпараттық технологиялар мектеп-лицей-интернатында «Наурыз-думан!» атты мерекелік шара ұйымдастырылды.

«Алаш» ауылы, «Жайық» ауылы, «Ақ Орда» ауылы болып оздырылған шара барысында мектеп оқушылары ұлттық әдет-ғұрып пен салт-дәстүрден сыр шертетін көріністер көрсетіп, ұлттық нақышта әндер айтып, ұлттық биден, күмбірлеген күйден тарту тартып, ұлттық ойындар кеңінен насихатталды.

Шара соңында мектеп директоры Ж.М.Шонбаев биылғы Наурыз мерекесі ұлттық құндылықтарымызды насихаттап, дәстүрімізді дәріптеуге бағытталған атаулы күндермен айшықталып отырғандығына ерекше назар аударып, «Наурызнама» онкүндігі аясында «Ұлттық киімдерді кию» челенджі және «Сыныптарды ұлттық нақышта безендіру» сайысы бойынша сыныптарды марапаттады. Қамқоршылық кеңес төрайымы А.С.Унаева құттықтау сөз сөйлеп, «Ынтымақтастығы жарасқан ауыл», «Өнерлі ауыл», «Берекелі ауыл» аталымымен сыныптарды марапаттады. Ұлтымыздың мерейін өсіріп, бар болмысымызды айшықтайтын қасиетті Наурыз мерекесі мектебімізде осылай тойланды.

Наурыз мейрамы құт-береке әкелсін! Әрбір жаңа күн әр отбасына шат көңіл, бақыт және береке сыйласын! Ұлыс оң болсын, ақ мол болсын!

Ұлыстың ұлы күні – Наурыз мейрамы құтты болсын!